NHAURIRANO| Mutambo wekuKwereta Mabhuku muGaraji raSpiwe Mahachi-Harper

we Mahachi-Harper akadzoka kuZimbabwe muna2017 ndokusvikopaza garaji rake kumaflats ekuWestgate. Zvaipisa mabhuku ake ane mukurumbira, Footprints in the Mists of Time (2013) naTales from the Kombi (2016),  achibuda mumudhindo, Mahachi-Harper akaronga kutama kubva United Kingdom, achizotambarara munyika inobva mazano ake semunyori. Pava paya, mukunda akaroverera masherefu, denga nematiles mugaraji rakare, izvo aitarisana nekugadzira imba yaangachetera mutundu waanga abva nawo kuNgirandi – mabhuku 400 kubva mumapazi anosanganisira uvaranomwe, nhoroondo, mamiriro epasi rino, zvidzidzo zvekubika, mitauro, kuchengeta bindu nezvimwe.

Zvamira kudai, Mahachi-Harper akakoka vanyori nevaverengi kumadirirano muimba itsva yekuverengera yaisiva garaji. Zvavaimedura chingwa nekuravana mhirimo, vaenzi vaMahachi-Harper vaisarudza mabhuku gumi pamunhu ekunopedza gore nawo, vachizodzosa zvavo pamadirirano egore rinotevera. Kwazofamba mhepo yakaipa, nguva yedzihwamupengo, Mahachi-Harper akambomisa chirongwa ichi. Zvazoteramira kunze, mukunda akatuma shoko kuvanyori nevaverengi zvakare kuti madirirano adzoka.

Musi wa26 Gumiguru, ini wenyu Sororemvumba, ndakamedura chingwa nevanyori nevaverengi vanosanganisira Madyira Chirikure Chirikure, Ethel Kabwato, Tsitsi Nomsa Ngwenya, Lawrence Hoba, Dorothy Maravanyika, Mwenewazvo Monica Cheru, Mutumwapavi Tinashe Muchuri, Brain Garusa, Tafadzwa Ndoro, Felix Mwase, Dr. Kupukile Mlambo, Kristian Hoppe naBeniah Munengwa pamadirirano egore rino, ndichizosiya mutambo nemabhuku aStanlake Samkange, Chenjerai Hove, Doris Lessing, Alexander Kanengoni, Spiwe Mahachi-Harper nevamwe. Mushure memadirirano, ndakava nenhaurirano inotevera naMahachi-Harper.

S: Makorokoto nemutambo unodadisa! Semunhu anofarira mabhuku, ndingati ndatanga kuona chiitiko chakadai nhasi. Pamakandikoka pamutambo wekutanga ndanga ndichangotamira kuBulawayo. Kutanga, ndingada kuziva kuti makawana sei zano remutambo uyu?

SMH: Ndakangogara ndichifarira mabhuku. Kubva ndiri mudiki ndaikweretesana nekuchinjana mabhuku nevamwe vangu. Asi mabhuku aya haana kumbobvira andikwanira, uye anga asingabati mapazi akawanda zvandinoda. Chifunga kuti ndakafara sei pandakatamira kuUnited Kingdom ndikaona kuti ndogona kuwana chero bhuku randafunga, ringava idzva kana rakamboshanda. Ndakatenga mabhuku akawanda zvikuru munguva pfupi pfupi.

Pfungwa dzangu dzakaramba dzichidzokera kuZimbabwe, kune vamwe vanofarira mabhuku seni. Ndaishuva kuti vawanewo mukana nemabhuku andanga ndaunganidza aya. Saka ndakaita shungu nekuunza mabhuku angu kuno. Ndichisvika Harare, ndakatanga nekushandura garaji rangu kuita imba yekuverengera. Zvakandinakira kuona mabhuku ese aya ari pamasherefu asi hazvina zvazvinobatsira kana pasina anomaverenga. Saka ndakazvimisira kuti sezvo ndichigara kuUK, ndichidzoka kumba kamwe kana kaviri pagore chete, ndichakoka vanyori nevaverengi kuti vakwerete kubva mumuunganidzwa wangu.

S: Maikoshesa chii pamaingunidza mabhuku aya. Tingati here, pane mapazi, misambo kana madingindira zvamaida kuona mumuunganidzwa wenyu kupfuura zvimwe?

SMH: Ndine misambo yandinofarira, asi ndaiunganidza mabhuku ndichitarisa zvingafarirwa nevamwe vaverengi vasiri ini. Ndine mabhuku andinoziva kuti ndogona kusafa ndakamaverenga asi achidiwa nevanwe vaverengi. Handisi kuphysics kana manovhero erudo asi ndina A Brief History of Time raStephen Hawking naFifty Shades of Grey (rakakweretwa nemumwe muverengi neSvondo).

Ndine mabhuku ezvekubika, zvemugadheni, zvakatikomberedza, nemitauro, chero ndichine mubazi iri Mabhuku angu mazhinji euvaranomwe anobva kumativi ose enyika, mumisambo yakasiyana (mabhuku enhoroondo yeupenyu, nganonyorwa, nhetembo, mitambo). Muunganidzwa wangu une manovhero evanyori vechiTurkish, Middle Eastern, African, American neRussian.

Bhuku randakapedzisira kuwedzera pane echiRussian, ibhuku risisanyanyowanikwa, rinonzi Twenty Letters to a Friend, rakanyorwa nemwanasikana waStalin, Svetlana Alliluyeva.   Muchikamu cheAfrican, ndinofara kuva nevanyori vemuZimbabwe vanoti Chenjerai Hove, Charles Mungoshi, Tinashe Muchuri, Memory Chirere, Tsitsi Nomsa Ngwenya, Lawrence Hoba, Nevanji Madanhire, Onai Mushava, Milton Kamwendo, Stanlake Samkange nevamwe.

Vanyori vakauya kuchiitiko cha26 Gumiguru havana kungokwereta mamwe emabhuku aya chete, asi vamwe vakapawo mabhuku avo avakanyora, zvinova zvapfumisa kwazvo chikamu chemabhuku emuZimbabwe mumuunganidzwa wangu. Ndingadai ndareva mabhuku andakapiwa aya pano asi ndichigere kumanyora pasi.

S: Tipirei tinzwe kuti mabhuku enyu akafamba sei rwendo rwekubva Ngirandi kuuya kuZimbabwe, muchizomaisa muchirongwa chekukweretesa vanyori nevavarengi.

SMH: Mabhuku akauya nengarava yakaunza midziyo yemumba. Muna2017, ndakaisa matiles, ceiling, madhirowa nemasherefu mugaraji rangu. Nguva yakarebesa yandakagara muZimbabwe mwedzi mina. Ndanga ndadzoka kuzogara muZimbabwe ndakazofunga kaviri nekuda kwezvimwe zvikonzero.

S: Makakwanisa kubatanidza mutambo nenguva pfupi, sezvo manga musina zuva mabva kuvhakacha kuMalawi. Pane ukama here pakati perwendo urwu  nebhuku renyu Footprints in the Mists of Time, rinotevedza nhoroondo dzevashandi vakabva kudziko rakanaka, vachizoshandira  kuZimbabwe?

SMH: Ndinogara kuUK, uye ndaiva kuMalawi nerwendo rwakadzikisa chishuvo chandakava nacho kwenguva refu kuti ndisvike kunyika iyi. Zvinoita sekuti upenyu hwangu hwese hwainanga pachiitiko ichi. Ndakakurira munhaunda yekuti vanhu vazhinji vaiva vashandi vakabva kune dzimwe nyika nemhuri dzavo. Vana vavo vakava shamwari dzangu, ndikadzidza mutauro wavo…

S: Kureva kuti munotaura mitauro mingani?

SMH: Ndinotaura chiShona, Chirungu, French neChewa…  Ndaiona vashandi ava vachiedza kukwana mune vamwe ndikanzwisisa kugozha kwazvo. Hazvisi nyore kugashirwa munzvimbo yaunotorwa semubvakure. Ndaifarira nhoroondo yavo nekuyemura kushanda nesimba kwavo.

Ndaida kuziva nhoroondo yavo. Vakuru vavo vairangarira mazita ematunhu avakabva, asi havana zvimwe zvizhinji zvavairangarira. Nzendo dzavo hadzina kunyorwa pasi saka vana vachatevera vakatarisana nedambudziko rekuzokanganwa kwakabva madzinza avo. Handina kungoyemura vanhu nenhoroondo yavo chete, asiwo nyika yavo. Ndakazvimisira kuti ndichashanyira nyika yavo rimwe zuva. Ndizvo zvandazokwanisa kuita gore rino. Zvinhu zvese zvanga zvava panzvimbo, ndikachiti ndoenda nebhuku rangu kuvaridzi varo.

S: Mutambo wa26 Gumiguru wakafamba sezvamaitarisira here?

SMH: Zvikurusa! Chiitiko chekukweretesa mabhuku waiva mukana wekuti vanyori, vaverengi nemabhururu vasangane vachidya, kunwa nekukurukura nyaya dzese dzese. Handitari urongwa kana hurukuro dzezuva. Vanyori nevaverengi vanotambirwa zuva rose; tinotandara chero nguva. Gore rino tanga tati kubva na12 dzemasikati kusvika 6 manheru asi mamwe masahwira akaedzesa kusvika kuma9. Kusununguka kwechiitiko ichi kunoreva kuti vanhu vanokwanisa kuuya nemabhururu avo anoda zvemabhuku.

Pane vaverengi vandakakwanisa kuona kekutanga neSvondo, kusanganisira Brain Garusa weBook Fantastics, VaChirikure Chirikure neshamwari yavo, VaKristian Hoppe. Pane zviso zvitsva gore rega rega kuratidza kukura kwemutambo.

Chiitiko chekukweretesa mabhuku hachisi chevanyori chete asi nevaverengi zvakare. Vanyori vose vanokokwa, vaverengi vanokokwa  mushure mekudomwa  neshamwari.

Mumitambo yapfuura takava nenguva inofadza nehama dzinofarira mabhuku neuvaranomwe saVaShingai Rukwata Ndoro, VaDavison Maruziva naVaSidney Mazvi. Ungangotondera kuti VaMaruziva vakashambadza uvaranomwe nemabasa eumhizha kwemakore mazhinji, kubva panguva yavainyora kamuri re“Scribe’s Scroll” mupepanhau reHerald, vachizotanga kutsikisa dandemutande rePanorama. Uvaranomwe hwedu hwune zvizhinji zvekuvatenda nazvo. Muchidimbu, sezvo pane zvizhinji zvingarodza pfungwa pamadirirano aya, achava chiitiko chegore negore.

S: Kune vasati vambova pamadirirano akadayi, mune zvidzidzo zvamungagoverana navo here pane zvamaona kubva 2017?

SMH: Pane mhando yemufaro inowanika mukupanana nekukweretesana mabhuku. Mufaro uyu unowedzerwa apo vaverengi vanokurukura mapazi ekunyora, madingindira, vatambi, nekuruka nyaya. Tinodzidza kubva kune zvatinoverenga asi tinowedzera kudzidza patinonzwa zvinofungwa nevamwe vaverengi. Kudzama kwehurukuruko kunobva pakudzika kwezvinonzwa vaverengi kubva pamabhuku.

Kusiya kwemabhuku andakaita kuchikoro neyunivhesiti, hapana novhero randakapenengura zvine udzamu saThe Unbelievable Lightness of Being raMilan Kundera. Ndinofunga Dr. Kupukile Mlambo vachine tsambagetsi dzatakapindurana padingindira, nyaya nevatambi vebhuku iroro. Ini, mudzidzisi weuvaranomwe, ndakadzidza zvizhinji kubva kunyanzvi yezvekuchengetedzwa kweupfumi. Dr. Mlambo, ndivozve nyakubatsira pakutsikiswa kwenovhero rangu retatu, Footprints in the Mists of Time (2013), ravakanyorerazve mhinzo. Ndingati kuverenga kunowedzera kunakidza kana uchikurukura nezvemabhuku nevamwe vanomafarira.

Mufananidzo wekutanga naMutumwapavi Tinashe Muchuri